Likhne se pehle,
dil mein khayal aata hai—
Ki aaj kuch aisa likh jaaun,
jo kali ko phool kar de,
doobti kashti ko saahil se mila de,
ki aaj kuch aisa likh jaaun…
Mand padti saanson mein
jeene ki aas jaga de,
chhupa ho aisa koi sandesh unke liye,
jinhone kuch naayaab khoya hai,
unhe sukoon-e-haalat mil sake…
Likhne se pehle,
dil mein khayal aata hai—
Ki aaj kuch aisa likh jaaun,
jisse haare hue mann ko
jeetne ka aagaaz mile,
jo bechain kar de,
aise kuch beetaa hua
us guzre kal ko poorn viraam mile…
Likhne se pehle,
dil mein khayal aata hai—
Ki aaj kuch aisa likh jaaun,
ki mehnatkashon ko
shirotaaj mile…
Likhne se pehle,
dil mein khayal aata hai,
dil mein khayal aata hai…